Македонија е рангирана на 111. место од 180 земји во светот според новиот индекс за слободата на медиумите на „Репортери без граници“ (РБГ). Земјава напредувала за 7 места, во однос на минатогодишното рангирање.
На Македонија друштво и прави Бугарија на 109. место, но и земји како Парагвај, Уганда, Централноафриканска Република и Габон. Според организацијата, медиумските слободи назадувале во целиот балкански регион, но ерозијата на правото било највидливо во Македонија.
„Клеветата беше декриминализирана во 2012 година, но, процесите беа заменети со граѓански, со можност за високи парични и затворски казни за новинари и сопственици на медиуми. Имаше голем број пријави за закани, насилство, малтретирање и заплашување на новинари за време на протестите во 2016 година, но малку од одговорните беа казнети за тоа. Политичката нестабилност влијае на работата на новинарите и притисоците од партијата на власт доведоа до некои медиуми самите да се цензурираат“, пишува во делот за Македонија насловен „Балканското лошо момче“.
Напади врз медиумите, репресии, лажни информации и триумф на „силните лица“ како Трамп и Ердоган – никогаш слободата на медиумите во светот не била толку загрозена, стои во годинешниот извештај на невладината организација „Репортери без граници“, посветен на слободата на медиумите.
Слободата на медиуми преживува „многу тешка“ и „многу сериозна“ ситуација во 72 од вкупно 180 земји, меѓу кои Кина, Русија, Индија, сите земји од Блискиот исток, Централна Азија и Централна Америка, како и две третини од земјите во Африка. Картата на светот изработена од „Репортери без граници“ е обележана целосно со црвена боја, што означува дека ситуацијата со слободата на медиумите е многу сериозна.
