Лажењето е нормална фаза во развојот за повеќето деца. Малите деца најчесто лажат за да се обидат да решат проблем.
Колку и да се чини безопасно, родителите треба да бидат свесни за ова. Лагата се користи за да се избегнат последиците, а за соочување со нив.
Задача на родителите е да ги научат децата како да ги решаваат проблемите на поконструктивен начин.
За да избегнат проблеми
Можеби детето прекршило правило или не направило нешто што требало. Ако детето нема друг излез, наместо да ги трпи последиците, лаже за да избегне проблеми. Понекогаш тоа е единствениот начин на кој може да го реши проблемот, и иако лажењето е погрешно, претставува вештина за преживување.
За да сокријат одреден дел од својот живот од нивните родители
Децата лажат кога мислат дека нивните родители се премногу строги и избираат да не ги слушаат. На пример, вие сте родител на 16-годишна девојка на која ѝ забранувате шминкање, но тоа го прават сите нејзини пријателки, па таа одлучува да го стори тоа и се обидува да го скрие од вас.
За да создадат одредена слика за себе
Децата ќе користат лаги за да создадат слика за себе, дури и ако таа слика е лажна. Може да се користи за да ги импресионира врсниците или како одговор на притисокот од околината. Ова не е невообичаено, на крајот на краиштата, сите знаеме возрасни кои го прават истото.
За да привлечат внимание
Кога детето е мало, лагите се ситни. Тогаш таквото однесување може да биде само негов начин за привлекување внимание. Помладите деца исто така измислуваат приказни за време на имагинативна игра. Во овој случај, тие ја развиваат имагинацијата и се обидуваат да го разберат светот околу нив.
Така, кога едно мало дете вели „Само што го видов Дедо Мраз како лета покрај мојот прозорец“, тоа е многу различно од постарото дете кое вели „Ја завршив домашната задача“, а не го направило тоа.
За да не повредат некого
Децата лажат за да не ги повредат туѓите чувства. Тие уште не знаат да кажат нешто на поубав начин, па затоа им е поудобно да лажат. Овој вид лажење е првиот чекор кон учење како некому да кажете нешто на повнимателен начин.
Оценката за сериозноста на лагата зависи од вас. Но, ако забележите дека детето лаже за нешто ризично, незаконско или небезбедно, тоа мора да се реши.
Ако станува збор за ризично однесување на училиште, сексуално однесување, дрога или други штетни активности, можеби ќе треба да побарате стручна помош.
Бирајте си ги битките. Вие најдобро го знаете и сакате вашето дете, но тоа не значи дека треба да го прикриете неговото лошо или ризично однесување. Фокусирајте се на она што е важно.
