Португалскиот фудбалер Кристијано Роналдо против Тотенхем одигра одличен меч во кој постигна хет-трик и му донесе исклучително три важни бодови на својот тим. Особено беше импресивен неговиот прв погодок на оваа средба.
Роналдо во 12 минута го постигна дефинитивно најубавиот погодок откако се врати на „Олд Трафорд“. Хари Кејн набргу го израмни резултатот на 1 : 1, но Роналдо со вториот гол во 38 минута донесе нова предност на Црвените ѓаволи. Во 72 минута Хари Мегваер со автогол ги врати работите на почеток, но потоа неверојатниот Роналдо го постигна третиот гол и му донесе победа на тимот.
Со двата гола против Тотенхем во првото полувреме, Кристијано Роналдо стана фудбалер кој постигнал најмногу голови на официјални натпревари, вкупно 806. Најдобар стрелец во историјата на фудбалот до скоро беше Јозеф Бикан, кој на 530 официјални натпревари има постигнато 805 голови.
Роналдо со првиот гол се израмни со Бикан, а со вториот го надмина и се запиша во историјата како најдобар стрелец. За ова достигнување му беа потребни 1.110 официјални натпревари.
Манчестер јунајтед е на четвртата позиција со 50 освоени бодови, два повеќе од Арсенал.
