Долниот дом на рускиот парламент едногласно изгласа да се воведе електронско испраќање на воени покани, што е новина во таа земја, а одлуката беше изгласана додека властите настојуваат да го отежнат избегнувањето на воениот рок. Думата прелиминарно го одобри законот во второ читање.
Руските власти соопштија дека за војната против Украина се мобилизирани нешто повеќе од 300.000 војници, а сега се обидуваат да регрутираат доброволци.
„Треба да го усовршиме и модернизираме системот за воено повикување“, рече портпаролот на Кремљ, Дмитриј Песков на редовниот брифинг со новинарите во вторникот, каде што потсети и на проблемите за време на минатогодишната мобилизација.
Првичната одлука за мобилизација за прв пат по Втората светска војна поттикна десетици илјади мажи на воена возраст да избегаат во странство, а протести избија во неколку руски градови, но брзо беа задушени. Песков ја отфрли тезата дека плановите за дигитализација може да предизвикаат дополнителен бран на паника и емиграција кај младите Руси кои сакаат да избегнат борби во Украина.
„Овој план не е поврзан со мобилизација“, рече тој и повтори дека властите не планираат да извршат втор бран на мобилизација.
Според сегашниот систем, на машките регрути им се испраќаат покани на нивните адреси. Војската понекогаш има проблеми со проверката дали воените покани се соодветно примени и дали адресата е точна.
Според новиот предлог, поканите ќе се испраќаат електронски и ќе се сметаат за испорачани веднаш по електронската испорака. Минатата година, Кремљ вети дека ќе ги исправи „грешките“ во првичната мобилизациска кампања, во која некои мажи кои не беа подобни за мобилизација поради возраста или здравствената состојба беа повикани да се борат во Украина.
