Стотици луѓе протестираат во сибирскиот град Кемерово, гневни на руските власти поради пожарот во трговски центар во кој загинаа најмалку 64 лица, од кои 41 дете.
Претседателот Владимир Путин отиде во Кемерово да ги посети преживеаните во болница и рече дека пожарот што се случи завчера е „криминална небрежност“.
Роднините на жртвите велат дека околу 85 луѓе уште се водат за исчезнати, од кои повеќето деца, пренесе новинската агенција „Интерфакс“.
Инспекторите велат дека противпожарниот аларм бил исклучен и дека излезите на трговскиот биле исклучени.
Околу 300 луѓе денеска се собраа пред седиштето на локалната власт и побараа откази на службеници одговорни за небрежноста.
Причината за пожарот уште не е позната, а Истражната комисија рече дека имало „сериозни прекршувања“ на противпожарните мерки во трговскиот центар „Зимнаја вишна“.
Путин го прогласи утрешниот ден за ден на жалост низ цела Русија.
На протетите, една жена рече дека децата им се јавувале на родителите и барале помош и да бидат викнати противпожарни екипи, на што присутните реагираа со аплаузи.
Кога службите побараа од толпата да се расчисти, незадоволните граѓани кои веќе седум часа протестираа, одговорија со исвиркување и барање одговорност од надлежните.
Регионалниот заменик-гувернер Сергеј Цивилев тогаш падна на колена и молеше за прошка, а толпата му аплаудираше.
На протестот граѓаните носеа транспаренти со натписи: „Колку жртви има точно?“, „Кој е навистина виновен?“ и „Колку чини да погледнете на другата страна?“
Засега се уапсени пет лица, меѓу кои и службеник за кој постои сомнение дека го деактивирал алармот.
Во објава на Facebook, локалниот политичар Антон Горелкин напиша дека „излезите за во случај на опасност биле затворени, поради што целиот комплекс бил претворен во стапица на смртта“ и „немало организирана евакуација“.
Тој исто така додаде дека апаратите за гаснење пожар со кои можело да се скроти пожарот не работеле.
Првичните сомнежи се дека некое од децата имало запалка со која ја запалило гумата во просторијата со трамполина и сѐ вивнало како сув барут.
