Руската Федерална служба за безбедност (ФСБ) наводно ги отфрлила обвиненијата против платеничката група Вагнер поради краткотрајниот вооружен бунт во текот на викендот, објавија во вторник руските новински агенции.
Новинската агенција РИА објави дека обвинението е отфрлено бидејќи „учесниците ги прекинале своите дејствија директно насочени кон извршување на кривични дела“.
Кремљ соопшти дека борците кои учествувале во бунтот нема да бидат кривично гонети и ќе им биде дозволено да се вратат во базата според договорот постигнат во саботата со кој се стави крај на кризата.
РИА исто така јави, повикувајќи се на Министерството за одбрана, дека Вагнер се подготвува да му предаде тешко оружје на министерството.
Обраќајќи ѝ се на нацијата за прв пат по завршувањето на краткотрајниот платенички бунт викендов, рускиот претседател Владимир Путин во понеделникот вети дека одговорните за вооружениот бунт, кој ја фрли неговата земја во хаос, ќе бидат „изведени пред лицето на правдата“.
Тој рече дека ќе го почитува своето ветување дека ќе дозволи борците на Вагнер да бидат префрлени во Белорусија, доколку сакаат, да потпишат договор со Министерството за одбрана или едноставно да се вратат кај нивните семејства.
Тој не го спомна шефот на Вагнер, Евгениј Пригожин, кој го започна вооружениот бунт.
Путин во саботата рече дека Русија докажала дека секоја „уцена“ е осудена на пропаст и им понудила на членовите на групата Вагнер да се приклучат на армијата, да одат во Белорусија или да се вратат дома.
„Ви благодарам (на Русите) за вашата издржливост, вашето единство и вашиот патриотизам. Оваа солидарност на граѓаните покажа дека секоја уцена (...) е осудена на пропаст“, рече тој во обраќањето до нацијата, пред да ги понуди војниците на паравоена група да потпише договор со редовната армија, да се „врати кај своите семејства и блиски“ или да „одат во Белорусија“.
Но, аналитичарите не веруваат дека Путин навистина ќе обезбеди слобода за Вагнерците и велат дека сето тоа може да биде стапица.
Во невиден предизвик за авторитетот на Путин, борците на групата Вагнер напредуваа кон Москва во саботата, барајќи смена на военото раководство за, како што тврдат, лошото водење на војната во Украина.
Тие потоа ненадејно го прекинаа својот бунт и се вратија во своите бази според договорот со посредство на белорускиот претседател Александар Лукашенко.
Шефот на руската платеничка група, Евгениј Пригожин, го шокираше светот кога во саботата започна вооружен бунт.
Пригожин побара министерот за одбрана Сергеј Шојгу и началникот на Генералштабот Валериј Герасимов - кого го критикуваше за, како што вели, катастрофалното раководство на војната против Украина - да дојдат во Ростов, кој неговите сили го заробија.
Тој рече дека има 25.000 борци кои ќе ја „обезбедат правдата“ и наводи, без да обезбеди докази, дека руската војска убила голем број борци од неговата приватна милиција Вагнер во воздушен напад, што Министерството за одбрана го негираше.