Руската православна црква работи на планови за изградба на свој Ватикан, проект за кој ѝ се потребни околу 2 милијарди долари.
Разговорите меѓу високите црковни лица и управата на градот Сергиев Посад, североисточно од Москва, траат уште од 2017 година.
Намерата е овој град да се претвори во „главен град на православието“, објави рускиот вебсајт Vedomosti.
Сергиев Посад е местото каде се наоѓа манастирот Света Троица-Сергиева лавра, кој се смета за духовен центар на Руската православна црква.
На почетокот на оваа година, црквата побара од рускиот претседател Владимир Путин да го поддржи овој проект.
Манастирот во 1345 година бил основан од еден од најчествуваните руски светци, Свети Сергеј Радоњешки, кој изградил дрвена црква во чест на Света Троица на ридот Маковец. Статусот на лавра, односно манастирска населба, манастирот го добил во 1744 година.
Црквата сега планира околу манастирот да изгради огромен комплекс градби, се наведува во документот од 300 страници, а како инспирација за овој проект се наведени Ватикан, Ерусалим и Мека.
Стратегијата предвидува реконструкција на Сергиев Посад, при што ќе биде поделен на духовен, станбен и управен округ.
Градоначалникот Михаил Токарев процени дека проектот би чинел околу 140 милијарди рубљи (2 милијарди долари) и дека ќе зазема една третина од градот, а во него е предвидено да има и музеј, културни центри, теолошка библиотека, хотел, висок црковен суд, медицински центар и православен медиумски центар.
Во документите се наведува дека проектот предвидува да се изгради и нов автопат, транспортни центри и нов аеродром за да се одговори на напливот на туристи.
