Се вели дека една слика вреди илјада зборови, а дека тоа е навистина така покажуваат снимките на сателитот Copernicus, кои ја покажуваат огромната штета предизвикана од пожарите во Грција за период од десет дена.
Сателитските снимки се направени помеѓу 1 и 11 август и јасно ја покажуваат штетата предизвикана од пожарите на грчкиот остров Евија. Се проценува дека и покрај големите напори на пожарникарите изгореле 50.910 хектари вегетација. По седум дена, пожарот беше само делумно ставен под контрола, а добрата вест е дека дождот им помага на пожарникарите во нивната работа. Сепак, неколку громови предизвикаа нови пожари.
Жителите кои беа евакуирани поради пожарот тврдат дека ситуацијата на островот е како хорор филм.
Грција беше погодена од седумдневен топлотен бран, најлош во последните три децении, а високите температури и жешките ветрови се идеални услови за ширење на огнови. Пожарот уништи вегетација, шуми, домови, деловни објекти и многу повеќе.
Гувернерот на Централна Грција, Фанис Спанос, рече дека ситуацијата на северот на островот е многу тешка.
„Фронтовите се огромни, како и уништената област“, рече тој.
Ризикот од пожар е исклучително висок и во наредните денови.
