BMW во последните години многу талкаше со дизајнот, дали сега се враќа на своите корени?
BMW веќе некое време најавува голема електрична револуција. Производните возила на новата платформа Neue Klasse се сè поблиску до реализација, а доказ за тоа е и новиот електричен SUV концепт, Vision Neue Klasse X.
Концептот е најава за сериски SUV модел кој ќе го замени сегашниот електричен iX3, инаку базиран на конвенционалниот X3.
Планот е новиот модел да влезе во производство во 2025 година, а од BMW тврдат дека овој теренец е значително усогласен со идното сериско возило.
Во внатрешноста очекувано доминира големиот екран на мултимедијалниот систем, но има и еден новитет. Имено, овој автомобил ќе има голем head up дисплеј кој во основа ќе ја проширува целата ширина на ветробранското стакло.
Однадвор, автомобилот ја следи класичната форма на SUV, со современ дизајн. Очигледно, тоа го најавува и враќањето на многу помалите, класични „бубрези“ на BMW на предната табла.
Се очекува серискиот Vision Neue Klasse X да го замени електричниот BMW iX3, додека X3 со бензински, дизел и хибридни мотори ќе добие свој наследник.
Основната идеја е нова технологија на електричен погон и батерии. BMW најавува технологија од 800 волти. Исто така, литиум-јонските батерии од следната генерација ќе бидат помали и полесни, ќе му овозможат на возилото досег на возење од 800 километри и 30 отсто побрзо полнење, велат од баварскиот производител.
Новиот концепт ќе биде официјално претставен за време на годишната конференција на BMW Group на 21 април.
Погледнете го од секој агол во нашата ФОТОГАЛЕРИЈА.
