Легендарната слаткарница Lebon, којашто се наоѓа во центарот на Истанбул ги затвора вратите поради превисока кирија.
Слаткарницата, според сопствениците, во Турција работи веќе 212 години. Но, сега луѓето кои ја водат се принудени да ја затворат, откако сопственикот на просториите на „Истиклал“ ја зголемил киријата. Претходната цена од 42.500 турски лири (околу 2.300 евра) е покачена на 185.000 лири (10.000 евра), според Абдурахман Џенгиз, еден од одговорните во слаткарницата.
„Оваа слаткарница е прва во отоманската и републиканската историја на земјата. Би сакал брендот да опстои, но тоа не успеа. За да се преселам на друго место, пак, ми требаат 10 милиони турски лири. И тоа е невозможно“, додаде Џенгиз.
За слаткарницата да продолжи да реаботи по старата кирија апелирале и од Општината, но залудно. „За последен пат го повикав газдата да направи компромис за разумно покачување на киријата“, вели Махир Полат, генерален секретар на Градската општина Истанбул.
Според него, во слаткарницата се инвестирани 10 милиони евра, а по затворањето, 12-мина вработени ќе останат без работа.
Слаткарницата Lebon била отворена 1810 година, од Едуард Лебон во областа Бејолу. Џенгиз и неговиот партнер Шакир Екинџи го купиле брендот во 1985 година.