Интересно откритие даде поранешниот предводник на Манчестер Јунајтед велејќи дека бил одбиен од римската икона Франческо Тоти.
Утре во рамките на полуфиналето од Лига Европа се среќаваат Манчестер Јунајтед и Рома, па по тој повод La Gazzetta dello Sport направи интервју со Сер Алекс Фергусон, најтрофејниот стратег во Премиер лигата чие име со златни букви е испишано во историјата на Манчестер Јунајтед.
Токму Сер Алекс ги водеше „Црвените ѓаволи“ на овој незаборавен дуел на „Олд Трафорд“ кога се сретнаа овие два тима, а Јунајтед славеше со неверојатни 7:1. Тоа беше во 2007 година во Лигата на шампионите.
Шкотскиот стратег во својата автобиографија ја има спомнато токму легендата на „Римската волчица“, Франческо Тоти, па затоа новинарот на Gazzetta го запраша дали некогаш се обидел да го донесе во Манчестер.
„Навистина ни се допаѓаше како играч и имавме во план да го вклучиме во нашиот состав. Но, само што го покажавме нашиот интерес веднаш ни стана јасно дека Тоти не сака да си замине од Рома“, вели Фергусон.
„Тој беше длабоко поврзан со градот. Неговото CV е јасно: Тоти го има носено само дресот на Рома“, открива Сер Алекс зошто не успеал да го донесе Италијанецот во црвениот дрес.
Познато е дека Тоти одбиваше бројни понуди, далеку побогати од она што го заработуваше на Рома, но до крајот на кариерата му остана верен на клубот за кој навивал уште како дете. Го има одбиено дури и Реал Мадрид и тоа во ерата на Галактикос, а сега е јасно дека ја одбил понудата дури и од великан како Сер Алекс Фергусон.