Свет

Сериски силувач и убиец откриен по 33 години, но не може да му се суди

19. септември 2019 - 14:53 | А.С.

Полицијата во Јужна Кореја реши случај на злогласен сериски убиец кој силувал и убил неколку жени пред 33 години.

Полицијата посветила 1,8 милиони работни часа од 1986 до 1991 година во истражување на смртта на десет жени од руралните предели на Хвасеонг, јужно од Сеул.

Новите ДНК анализи го поврзаа 56-годишниот Ли Чун-јае со најмалку три од случаите.

Осомничениот веќе отслужува затворска казна за силување и убиство на неговата снаа во 1994 година.

Тој ги негира обвиненијата и не може да биде изведен пред суд за овие случаи, бидејќи согласно јужнокорејските закони, делата се застарени од април, 2006 година.

Убиствата на жените кои биле на возраст од тинејџерки до 70-тина години беа инспирација за наградуваниот филм „Memories of Murder“.

Полицијата испраша 21.000 луѓе во истрагата и направи споредување на отпечатоци на прсти на уште 20.000, но без никаков успех.

„Изразувам најдлабоко сочувство до семејствата на жртвите и на корејската јавност, што го немавме решено овој случај толку долго време“, рече Бан Ги-со од обласната полициска единица на Гјеонги.

„Ќе дадеме сѐ од себе да ја откриеме вистината до крај, со елемент на историска одговорност.“

Повеќето жртви биле убиени со давење, објави корејската новинска агенција Yonhap. Убиецот најчесто користел лични предмети на жртвите за да ги задави, како чорапи и хулахопки.

Коментирај