Северна Кореја нема заразени од коронавирусот, соопштија официјални претставници на здравствените власти во земјата, иако постои скептицзам за ова нивно тврдење покрај фактот што скоро милион луѓе низ светот се потврдени случаи.
Земјата е веќе изолирана, границите се затворени уште во јануари и преземени се строги мерки откако Кина објави податоци за заболени.
Пак Мјонг Су, директор на Централниот итен инфективен оддел во Северна Кореја вели дека овие преземени мерки се успешни.
„Ниту еден човек е инфициран од новиот коронавирус во нашата земја“,вели тој. „Преземавме предвремени мерки и применивме научни сознанија како инспекции и карантин за сите кои влегоа во нашата земја и направивме дезинфекција, ги затворивме границите и го блокиравме авионскиот сообраќај, како и морскиот пат“, објаснува Пак.
Експерти сметаат дека Северна Кореја е многу ранлива на пандемија поради слабиот медицински здравствен систем и меѓународните санкции, кои создадоа недостиг на храна во земјата. Обединетите Нации сметаат дека 10,3 милиони луѓе гладуваат или имаат потреба од помош.
Светската здравствена организација планира да ѝ помогне на Северна Кореја со помош од 900.000 долари како поддршка на справување со коронавирусот.