Учесниците на протестот „Ултиматум, не благодарам“ кој се одржува шести ден против францускиот предлог пристигнаа пред Собранието. Засега протестот се одвива мирно, а собраниската зграда е обезедена од полициски кордон.
Блокади низ целата држава од утре со почетокот во 13 часот, беа најавени вечерва од протестот пред Собранието.
Протестниот марш почна пред владината зграда и продолжи кон Министерството за правда, каде дел од граѓаните симболично положија бели ружи пред полицајците кои ја обезбедуваат зградата.
Како и во изминатите денови од протестот учесниците бараат оставки и отфрлање на предлогот и се пеат патриотски песни.
Претседателот на ВМРО-ДПМНЕ, Христијан Мицкоски, пред стартот на протестот порача дека нема да наседнуваат на провокациии, истакнувајќи дека силата е во масовноста, а не во насилството.
По пристигнувањето на предлог преговарачката рамка во Собранието Мицкоски порача дека Владата „се плаши самата да донесе одлука и тежиштето го префрла во Парламентот, нагласувајќи дека ВМРО ДПМНЕ нема да поддржи какви било уставни измени.
За време на вчерашниот протест против францускиот предлог беа повредени тројца полициски службеници, а приведени пет лица. Јавното обвинителство вечерва соопшти дека е предложен притвор за три лица осомничени за инциденти за време на протестите во Скопје.