Полицијата во Мјанмар активираше шок бомба за да ги растера демонстрантите во Јангон, најголемиот град во Мјанмар.
Тие се собраа пред состанокот на шефовите на дипломатиите на соседните земји со претставниците на армијата на оваа земја.
Според Reuters, кој се повикува на очевидци, досега не е соопштено дека има повредени.
Демонстрантите, многумина со шлемови и импровизирани штитови, се собраа зад барикадите во различни делови на Јангон, извикувајќи пароли против владеењето на воената хунта.
Според извештаите на медиумите, демонстрантите се собрале и во други делови на земјата. Протестите се одржаа во очи на средбата на шефовите на дипломатиите на соседните земји со претставниците на армијата на Мјанмар, чија цел е да ја смират насилната состојба во земјата.
Разговорите ќе се одржат два дена по најкрвавите немири во Мјанмар, откако армијата ја собори избраната влада на Аунг Сан Су Ќи пред еден месец, што предизвика масовни протести на улиците низ Мјанмар.
Министерот за надворешни работи на Сингапур Вивијан Балакришнан изјави дека шефовите на дипломатиите собрани во Асоцијацијата на нации од Југоисточна Азија (ASEAN) ќе им пренесат на претставниците на армијата во Мјанмар дека се згрозени од насилството во таа земја.
Во интервју во понеделникот, Балакришнан рече дека ASEAN ќе го охрабри дијалогот помеѓу Су Ќи и воената хунта.
Завчера најмалку 18 лица беа убиени, а повеќе од 30 беа повредени откако полицијата отвори оган кон демонстрантите кои протестираа против воениот удар и апсењето на легално избраниот премиер Аунг Сан Су Ќи, соопшти Кабинетот за човекови права на ООН.
Мјанмар е во хаос веќе еден месец, откако армијата изврши државен удар и ги приведе избраната премиерка Аунг Сан Су Ќи и бројни други политичари, нејзини сопартијци, за наводна измама на изборите во ноември.