Фудбалерите на Манчестер Јунајтед приредија големо изненадување синоќа во Париз. По резултатот од 0:2 на домашен терен, синоќа го победија ПСЖ во Париз со 3:1 и влегоа во четвртфинале.
Неверојатниот меч од Лигата на шампиони беше решен во третата минута од судиското надополнување кога Маркус Рашфорд од пенал го постигна одлучувачкиот гол.
Два пати Ромелу Лукаку ја затресе мрежата на домаќините и Бернат постигна гол за парижаните, но понатаму продолжува тимот што во Париз стигна без десет играчи и настапи со тајното оружје на тренерот Оле Гунар Солскјер – јуниорите Чонг и Гринвуд.
Еден ден по големото изненадување што му го направи Ајакс на Реал Мадрид на домашен терен, истото го направија избраниците на Солскјер во Париз. Речиси отпишани, без десетмина играчи, им пружаа голем отпор на фаворизираните парижани и продолжија во четвртфинале.
Секако, имаше спорни моменти. Одлуката на судијата Дамир Скомина во продолжението да ја прегледа ВАР снимката на инсистирање на помошниот судија и да покаже на белата точка ќе биде дискутирана уште долго време, но тоа не го намалува успехот на Јунајтед кој уште еднаш покажа дека го има капацитетот за големи мечеви.