Помалку сончева светлина, поладни денови, подолги ноќи и помалку време на отворено, сето тоа може да влијае на вашето ментално здравје.
Во овие подоцнежни месеци од годината, а особено кога навлегуваме подлабоко во есента и почнуваме да размислуваме за зимата, многу луѓе може да доживеат промени во расположението - тоа е вообичаено.
Здравствените експерти открија зошто тоа се случува, како можеме да се справиме со промените во нашето ментално, емоционално и физиолошко здравје и како да ги подобриме симптомите и расположението.
Зимскиот блуз, често наречен сезонско афективно растројство (САД), се однесува на тип на депресија што обично се јавува во текот на есенските и зимските месеци, кога изложеноста на природна сончева светлина е намалена.
Рајан Султан, истражувач и психијатар на Универзитетот „Колумбија“ во Њујорк, истакнува дека тоа е призната состојба на ментално здравје која се карактеризира со промени во расположението и однесувањето кои следат сезонски модел.
„Додека многу луѓе доживуваат поблаги промени во расположението во текот на зимата, САД претставува потешка и клинички значајна форма на оваа состојба“, истакна д-р Султан.
Точната причина за зимскиот блуз не е целосно разбрана, но се верува дека неколку фактори придонесуваат за неговиот развој.
Еден од примарните фактори, вели тој, е намалената изложеност на сончева светлина во текот на есенските и зимските месеци.
Сонцето е она што ни носи убава енергија и оптимистички енергични моменти во кои уживаме во потоплите денови. Темнината која започнува околу 17 часот попладне може да поттикне развој на сезонска депресија, односно т.н. зимски блуз.
Покрај падот на енергијата и лошото расположение, зимскиот блуз може да донесе и низа други емоции и состојби како што се зголемена загриженост, замор, анксиозност, поспаност, летаргија, слаба концентрација и слично.
Симптомите на зимскиот блуз или сезонско афективно растројство, може да варираат по сериозност, но обично го вклучуваат следново:
- постојано чувство на тага, безнадежност или вознемиреност;
- ниска енергија и зголемен замор;
- зголемена потреба за сон и отежнато будење наутро;
- желба за јаглени хидрати и зголемување на телесната тежина;
- тешкотии во концентрирањето и донесувањето одлуки;
- социјално повлекување и намален интерес за активности;
- раздразливост и зголемена чувствителност на отфрлање.
„Важно е да се напомене дека овие симптоми обично се јавуваат кон крајот на есента или почетокот на зимата и се намалуваат во пролет.
Сепак, зимата треба да се преживее, без разлика дали сте нејзини поддржувачи или не, бидејќи и таа е дел од годишниот циклус и не може да се избегне ако така сакаме. За да си го олесните овој период и да не паднете во целосна депресија, обидете се секој ден да направите нешто убаво за себе за кое знаете дека ќе донесе насмевка на лицето и топлина во вашето срце.
