Рускиот претседател Владимир Путин гледа германски телевизиски канали за да го вежба германскиот јазик кој течно го зборува, откри неговиот портпарол.
„Гледа германски ТВ канали, гледа и канали на англиски јазик. Има и на англиски јазик, не секој ден, туку неколку пати неделно. Ова се кратки, но редовни лекции“, изјави Дмитриј Песков за „Аргументи и факти" во интервју објавено во вторникот.
Путин со години живеел во источногерманскиот град Дрезден, додека градот беше дел од источна Германија, како офицер на советската служба КГБ, и таму научил течно да зборува германски.
„Многу важно хоби му е читањето, особено историската литература и мемоари“, рече Песков за неговиот шеф.
„Се разбира, има миленичиња во животот на претседателот“.
Сепак, животните во моментов се чуваат подалеку од јавноста, за разлика од лабрадорот Кони, кој почина пред извесно време.
„Ретко ги има во јавноста, па затоа не сакам да кажувам ништо за нив“, рече Песков. На прашањето дали се мачки или кучиња, тој истакна дека никогаш не видел мачки во куќата на претседателот.
„Кучиња да, но мачки не“.
Песков вели дека Путин повеќе не одржува блиски контакти со некој политичар на власт како што имал со поранешниот германски канцелар Герхард Шредер или италијанскиот премиер Силвио Берлускони.
„Знаеја да се сретнат во различни формати“, рече тој.
Продолжете да читате >>> Викенд во Сибир: Владимир Путин на одмор со Сергеј Шојгу
