Интересната мелодија која навивачите на Англија ја потпевнуваат на ова Европско првенство крие посебна приказна, приказна кој нема врска со тоа дека „пехарот се враќа дома“.
За време на Европсково првенство нема кој не ги слушна англиските навивачи како ги пеат стиховите „It's Coming Home“. Но, ако убаво се потсетиме, истите стихови ечеа и на Мундијалот во Русија пред три години. Тоа е песна која Англичаните ја пеат на секој голем турнир кога нивната репрезентација стигнува далеку, со тоа што такви сценарија во последните 25 години се случија само три пати: сега, во 2018 и во 1996.
Токму 1996 е годината кога се раѓа овој познат стих. И тоа сосема за друга намена. Англија во 1996 е домаќин на Европското првенство, а на 20 мај истата година рок-бендот „Lightning Seeds“ заедно со дуото комедијанти Дејвид Бадил и Френк Скинер ја пуштаат во етер песната насловена како „Three Lions“. Песната е на барање на ФА за да се направи навивачка химна на англиската репрезентација, но откако „Lightning Seeds“ решаваат да го донесат комедијантите во тимот, песната добива друг терк. Потоа ФА дури и се буни за изборот на зборови, па некои стихови се исфрлени и заменети.
Стиховите на песната, меѓу кои и познатиот „It's Coming Home“, алудираат на фактот што прв пат по Мундијалот во 1966 година фудбалот се враќа во Англија, земјата која го измисли. Згора на тоа, во песната се пее за агонијата на англиските навивачи кои освен тој Мундијал не знаат за друг успех на нивната репрезентација, позната под прекарот „Трите лава“ (оттаму и насловот на песната). И покрај неуспесите од минатото, секое ЕУРО или Мундијал Англичаните го дочекуваат со нов оптимизам дека овој пат ќе биде поинаку („I know that was then, but it could be again“).
Песната станува толку популарна што веднаш добива алтернативен наслов и тоа „It's Coming Home“, а се пробива на врвот на британската топ листа. Навивачите лудуваат за песната на ЕУРО 1996 понесени од еуфоријата дека нивната репрезентација доаѓа до полуфиналето, на чекор од пехарот. Но, таму следува повторно големо разочарување: Германија ги победува на пенали и тоа откако сегашниот селектор Гарет Саутгејт го промашува решавачкиот пенал.
Оттогаш песната добива друго значење: не дека фудбалот ќе се врати дома, иако стихот „Football's Coming Home“ останува непроменет, туку дека пехарот ќе се врати дома, било тоа бил европски или светски пехар. Најблиску Англичаните дојдоа на Мундијалот во Русија кога малку фалеше пехарот да се врати дома, но Хрватите во полуфиналето ставија крај на тие надежи.
Сега, на ова Европско првенство Англичаните се поблиску од било кога. Веќе се во финалето кое се игра в недела на нивниот „Вембли“, но противник е забрефтаната Италија чии навивачи порачуваат дека пехарот нема да се врати дома, туку во Рим.
