Четири лица загинаа, а пет се водат за исчезнати по експлозија која предизвика уривање на четирикатница на Сицилија, соопштија денеска властите.
Две жени се пронајдени живи под урнатините во Равануса, на југот на земјата, откако зградата се урна синоќа, а спасувачите со кучиња трагачи се уште трагаат по преживеани на местото на несреќата.
Локалната единица за цивилна заштита на Twitter потврди дека досега загинале четири лица.
На телевизиските снимки се гледаат урнатини и дрвени греди на местото на зградата, околу која се наоѓаат оштетени градби.
Експлозијата најверојатно била предизвикана од истекување гас, соопштија властите и веднаш отворија истрага.
-Гасот веројатно нашол шуплина каде што се акумулирал, изјави Џузепе Мерендино, командант на пожарникарите во провинцијата Агриџенто, за телевизиската станица Rainews24. Насобраниот гас веројатно бил активиран од случајно активирање: автомобил, лифт, електричен апарат.
Набргу по експлозијата, градоначалникот на Равануса, Кармело Д’Анџело, преку Facebook ги повика на помош „сите достапни луѓе кои имаат лопати и булдожери“.
– Се случи катастрофа, кажа тој.
Педесет луѓе мораа да ги напуштат становите, изјави Д’Анџело за Rainews24, бидејќи во експлозијата се оштетени и соседните згради.
