Моќен земјотрес со магнитуда од 7,4 степени по Рихтер ја погоди областа на 97 километри од Кристчрч на Нов Зеланд, објавија американскиот геофизички институт USGS и Европскиот сеизмолошки центар.
Земјотресот е почувствуван во 00.02 часот по локално време, односно 11.01 часот по Гринич, со епицентар на 61 километар од градот Амберли на Нов Зеланд и 208 километри југозападно од главниот град Велингтон, на длабочина од 10 километри.
Американскиот пацифички центар за предупредување од цунами објави дека нема закани од цунами по земјотресот.
Жителите од градовите и местата на околу 100 километри од епицентарот изјавија дека биле многу исплашени од земјотресот, кој го почувствувале како силни заплиснувања во текот од повеќе од 2 минути. Се известува за паднати предмети по домовите, а граѓаните ноќта ја минуваат на улиците. Засега нема податоци за настрадани или за материјални штети.
Кристчрч е најголемиот град на новозеландскиот Јужен остров. Земјотресот со магнитуда од 6,3 кој го погоди градот во февруари 2011 година усмрти 185 лица и предизвика големи материјални штети.
