Секој жив човек што ја извршувал функцијата претседател на Соединетите Американски Држави потекнува од предци кои во своето време биле сопственици на робови - освен Доналд Трамп.
Ова е заклучокот од новата студија на Reuters, која ја истражува историјата на предците на американските функционери и претседатели, а според која е заклучено дека сите живи американски претседатели се потомци на робовладетели, освен контроверзниот Доналд Трамп.
Покрај претседателите, истрагата покажа дека двајца судии од Врховниот суд, 11 гувернери и 100 членови на Конгресот се директни потомци на робовладетели.
Меѓу нив има истакнати членови на двете партии. Меѓу републиканците, најпопуларни имиња се лидерот на малцинството во Сенатот, Мич МекКонели и сенаторката Линди Грем, а од демократите во истражувањето се најдоа сенаторката Елизабет Ворен и Теми Дакворт.
Дури и Барак Обама - првиот црн претседател на САД - е потомок на робовладетели од страна на неговата мајка, која е припадничка на белата раса.
Според Reuters, меѓу живите американски претседатели кои потекнуваат од робовладетели е и Џо Бајден, кој имал директен предок робовладетел, но пет генерации наназад. Предокот на Бајден имал еден роб.
Што се однесува до Барак Обама, тој имал предок шест генерации наназад, кој имал двајца робови.
Предокот на Џорџ Буш поседувал дури 25 робови, а на Бил Клинтон еден роб.
Меѓу споменатите претседатели се издвојува Џими Картер, чиј предок пред четири генерации поседувал дури 54 робови.
Сепак, најмногу се истакнува поранешниот и контроверзен американски претседател – Доналд Трамп.
Додека другите претседатели имаат длабоки корени од предците во Америка, предците на Трамп не емигрирале во Соединетите Држави сѐ додека ропството не било укинато во 1865 година.
Всушност, ниту еден од неговите баба и дедо не е роден во САД. Бабата и дедото на Трамп по татко се родени во Калштат, мал град во Југозападна Германија, а во САД емигрирале во раните 1900-ти.
Во меѓувреме, неговата мајка Мери е родена во Шкотска.
И покрај тоа, Трамп има долга историја на одбрана на симболите на Конфедерацијата - како претседател се спротивстави на преименување на американските воени бази именувани по генерали на Конфедерацијата, и покрај тоа што Министерството за одбрана беше отворено за промени.
Тој, исто така, еднаш неславно изјави дека има „многу добри луѓе од двете страни“ во конфликтот во кој беа вклучени белите националисти во Шарлотсвил, Вирџинија, поради отстранувањето на статуата на конфедералниот генерал Роберт Е. Ли.
Џорџ В. Буш е единствениот поранешен жител на Белата куќа кој одговори на барањето на Reuters да ги коментира резултатите од истражувањето на Reuters.
„Ви благодарам за вашето важно истражување. Како што рече претседателот Буш во посветеноста на Националниот музеј на афроамериканската историја и култура: 'Големата нација не ја крие својата историја, таа се соочува со своите грешки и ги исправа'. Не можеме да се приближиме до ветените еднакви можности за сите без да се потсетиме на основниот грев на ропството. Тоа вознемирувачко минато нè инспирира да се движиме подалеку и побрзо кон подобра иднина на слобода и правда за сите“, рече во соопштение шефот на кабинетот на Буш.
Одговори и портпаролот на Џими Картер, но истакна дека семејството Картер моментално се фокусира на здравјето на поранешниот претседател за време на неговиот престој во болница, истакнувајќи дека Картер отсекогаш бил поддржувач на расната еднаквост и правда, откако станал гувернер на Џорџија.
