Првата дама на САД хранеше слончиња со шишенце и направи кратка сафари тура во Кенија, во третата етапа од нејзината самостојна турнеја низ Африка.
За време на посетата на слончињата сираци, едно младенче се стрча кон Меланија и ја турна, а првата дама иако малку се исплаши, остана прибрана и насмеана и потоа го хранеше и галеше слончето.
Меланија со теренско возило го посети националниот парк Најроби, а потоа и градот.
Нејзината турнеја што е главно посветена на децата, почна во вторникот во Гана со посета на педијатриска болница, а потоа продолжи во Малави.
Два дена подоцна претседателот на САД Доналд Трамп од Белата куќа ја пофали Меланија за „беспрекорната турнеја“.
Кенија, родната земја на таткото на претходниот американски претседател Барак Обама, е една од земјите што најмногу е наклонета на САД, покажа едно неодамнешно истражување на институтот Pew Research.
Анкетата покажа дека 70% од Кенијците имаат позитивно мислење за САД и дека 56% имаат доверба во Доналд Трамп.
