Словенија вчера усвои измени на Законот за продавници со кои се укинува работењето на продавниците во недела и за празници.
Словенечкиот портал 24uhr објави дека се работи за предлогот на пратениците од левицата, а измените на Законот ги поддржаа 72 од 88 пратеници кои вчеравечер беа присутни во Парламентот. Нивната одлука стапува на сила 15 дена по објавувањето во Службен весник.
Наведено е дека исклучоци се предвидени за продавници до 200 квадратни метри што се наоѓаат на бензински станици, гранични премини, пристаништа, аеродроми, железнички и автобуски станици, како и во склоп на болници.
Исклучоци се и други продавници помали од 200 квадратни метри, но под услов сопствениците сами да ги послужуваат муштериите, со помош евентуално од пензионери или студенти.
Расправата за тоа дали продавниците треба да бидат затворени во недела и за празници во Словенија трае со децении, слично како и во Хрватска каде во последно време повторно се актуелизира.
Со ова прашање во Словенија се занимаваше и Уставниот суд, а во септември 2003 година граѓаните за тоа се изјаснија и на референдум.
Забраната за работа во недела тогаш ја поддржаа нешто повеќе од 57% од гласачите кои излегоа на референдумот.
Меѓутоа, одлуката што вчера ја донесе Парламентот не ја поддржува и словенечката Влада.
Државниот секретар во Министерството за економија Димон Зајц вчера во Парламентот ја изрази загриженоста на Владата бидејќи станува збор за одлука што се однесува на стратешка гранка на стопанството на земјата и тоа во време кога ситуацијата е исклучително тешка. На измените на Законот остро се противи и Стопанската комора на Словенија.
Според Законот за работните односи кај нас, полното работно време не смее да биде подолго од 40 часа неделно ако договорот за вработување гласи на полно работно време. Со закон, односно со колективен договор може да се одреди како полно работно време, работното време кое е пократко од 40 часа неделно, меѓутоа не помалку од 36 часа неделно.
За работа во денови на празници и неработни денови утврдени со закон, работникот има право на надомест на платата што му припаѓа кога во тие денови не работи и плата за поминатите часови на работа зголемена за 50%.
