Сите сакаме убав и свеж мирис да нè придружува цел ден, а нема подобар комплимент од тоа кога ќе нè запомнат по одредена мирисна нота. Секогаш кога се подготвуваме за состанок, работа или некој друг настан, го нанесуваме омилениот парфем, но пречестата употреба не е најздравата опција.
Наместо да потрошите многу пари, можете сами да си направите парфем: имате слобода да го направите саканиот мирис без штетни состојки. Сè што ви треба е: етерични масла, етанол (алкохол) и дестилирана вода.
Етеричните масла не само што имаат исклучително пријатен мирис, туку имаат и одлични лековити својства. Употребата на етерични масла за козметички и медицински цели се користи уште од античко време.
Кога ќе се впуштите во процесот на правење парфем, најдобро би било сами да одберете 3 до 5 етерични масла и да ги измешате, за да ја добиете токму онаа нота што ја сакате.
Можете да капнете масла на мал лист хартија или тест лента за парфем и да пробате различни комбинации додека не го добиете совршениот мирис.
Кога ќе направите концентрат од избраните масла, додадете 2 лажички етанол (алкохол). Потоа во смесата додадете уште 60 ml дестилирана вода. Добро промешајте.
Во зависност од тоа колку јак мирис сакате, можете да додадете помала или поголема количина на етерични масла. Добрата страна на овие масла е што тие во просек имаат помала веројатност да предизвикаат алергиски реакции на кожата во споредба со парфемите.
Доколку имате одреден дерматолошки проблем или алергиска реакција, најдобро би било прво да се консултирате со лекар.