Компанијата која се нафати да го одглавува заринканиот огромен товарен брод кој го блокираше сообраќајот во Суецкиот Канал вели дека ќе биде потребно доста време за негово одглавување.
Гигантскиот брод „Ever Given“ кој е во служна на тајванската компанија Evergreen Marine и кој плови под панамско знаме се заглави вторникот утрината и тоа дијагонално, со што го блокираше проодот низ каналот. На заглавувањето му претходело губење на контролата и нагло вртење поради силниот ветер.
Откако египетските власти со своите багери не успеаја ни сантиметар да го помрднат заринканиот колос, беше ангажирана компанијата Boskalis, која сега работи на негово ослободување, но и предупреди дека работата е крајно деликатна и ќе треба време.
„Тој е како енормен кит насукан на плажа. Тоа е неверојатна тежина врз песокта. Не исклучуваме дека веројатно ќе ни бидат потребни недели за да го ослободиме“, велат од компанијата.
Поради тежината, моментално се работи на растоварање на контејнерскиот товар од бродот за да се ослободи притисокот врз песокта каде што е заглавен. Освен товарот, од бројот се вади и гориво и вода.
Пловилото тешко 219.079 тони делумно беше ослободено на еден дел, кога таканаречени бродови-туркачи го помрднаа малку, доволно за да се отвори простор за сообраќајот делумно да продолжи да се одвива. Така, сега има можност за до 50 бродови на дневна основа да минуваат низ Суецкиот Канал.
Сепак, бродот и натаму е заринкан во песокта, а неговиот GPS покажува дека сосема малку е помрднат во изминатите 24 часа.
Инцидентот создаде голема блокада во бродскиот сообраќај и трговијата која зависи од товарните бродови. Некои компании предупредија дека доколку каналот наскоро не се врати во нормала ќе мора да најдат нова рута за нивните пловила. Но, она што тие го бараат, комплетно отворање за најмногу 48 часа, е невозможно.