Авионот Solar Impulse 2 успешно го заврши патувањето околу светот и слета во Абу Даби. Летот започна на 9 март 2015 година во Абу Даби и успешно заврши по минати 42.000 километри без употреба на гориво.
Пилотот Бертран Пикар во неделата тргна од Каиро минувајќи повеќе од 2.763 километри за повеќе од 48 часа. Пикар и Андре Боршберг си ги менуваа местата во авионот на соларен погон, а целото искуство денеска ќе го претстават на конференција во Абу Даби.
Патувањето беше низ четири континенти, три мориња и два океана, вкупно минати 42.000 километри. Најдолгиот лет од 8.924 километри било патувањето од Нагоја во Јапонија до Хаваи, САД. Траело 118 часа и со него е срушен рекорд за најдолг, непрекинат соло лет, пишува BBC.
Solar Impulse 2 е тежок 1,5 тони и лета со просечна брзина од 80 километри на час. Летот околу светот траеше повеќе од година и 4 месеци.
