Фудбалерите на Лестер продолжија со брилијантните партии во Премиер лигата, откако во првиот натпревар од 25.коло, во Манчестер убедливо го поразија Сити со 3-1.
Екипата на Клаудио Раниери во целост го надигра скапиот тим на Мануел Пелегрини, а поубедлив пораз спречи голманот на Сити, Џо Харт, иако „граѓаните“ во судиското надополнување на времето имаа шанса да го намалат поразот.
Победата на Лестер ја најави Германецот, Роберт Хут, кој најдобро реагираше на нафрлувањето од Марез уште во третата минута.
Лестер предноста ја удвои во 48. минута, кога Марез постигна одличен гол. Алжирецот најпрвин го претрча Отаменди, потоа со дриблинг се ослободи од Забалета и го совлада Харт.
По еден час игра победата на „лисиците“ ја потврди Хут со својот втор гол.
До крајот на натпреварот, во 86. минута, Серхио Агуеро, го постигна почесниот гол за Сити, иако впечатокот е дека Аргентинецот беше во офсајд.
Лестер и по 25.коло ќе остане лидер на табелата со 53 бодови, шест повеќе од Сити и осум од Тотенхем и Арсенал, кои имаат и натпревар помалку.
