Нова книга базирана на извори од најтесните кругови на францускиот претседател Емануел Макрон открива експлозивни детали за Макрон и неговата сопруга Брижит Троње, како и за нејзината улога во Елисејската палата.
Во книгата насловена „Madame La Presidente“, новинарите на Le Parisien Ава Џамшиди и Натали Шук пишуваат за едно бизарно сценарио кое најблиските советници на Макрон сонуваат да се реализира: Брижит да умре, за да може претседателот да ја игра улогата на „ужален вдовец“.
„Сонуваат таа да умре. За нив е идеален тој имиџ на ужален вдовец. Го обожаваат. Ноќе сонуваат Брижит да исчезне“, пишува во книгата, според извор близок до претседателската двојка кој исто така тврди дека на Макрон би му било подобро без неа.
Двете новинарки алудираат на Исмаел Емелиен, коосновачот на партијата на Макрон Ен марш! и неговиот директор на изборната кампања Стефан Сежурне, кои му беа политички советници на Макрон до 2018 година и се меѓу оние кои ја презираат првата дама на Франција.
Авторките на книгата тврдат дека 65-годишната Брижит има огромно влијание врз нејзиниот сопруг кој е 24 години помлад од неа и дека учествувала во изборот на министри за неговиот кабинет.
Џамшиди и Шук ја претставуваат Брижит како „новата Марија Антоанета“, алудирајќи на прилогот во весникот Le Monde во кој таа зборува за реновирањето на Елисејската палата вредно 600.000 евра, само три дена пред да избијат протестите на Жолтите елеци поради предвидените зголемувања на данокот за дизел горива.
Елисејската палата и Макрон не ја коментираа содржината на книгата.