Темата „Јавна соба“ повторно се актуелизира деновиве откако беше обелоденето дека на социјалната мрежа Telegram над 5.600 членови на групата споделуваат фотографии, профили од социјални мрежи, лични податоци, адреси и броеви од девојки.
Министерот за внатрешни работи, Оливер Спасовски, преку социјалните мрежи соопшти дека приведени се две лица во врска со случајот.
„Две лица, едно во Битола и едно во Велес се приведени во врска со случајот Јавна соба, а се преземаат мерки и активности и кон други лица. Работиме во координација со јавното обвинителство со цел целосно расчистување на случајот и содветно санкционирање на сторителите“, напиша тој.
Претходно, од МВР го повикаа секој граѓанин што е жртва на ваква злоупотреба да пријави во најблиската полициска станица и дека во координација со обвинителството преземаат соодветни мерки.
Исто така нагласија дека продолжуваат со „интензивните напори да се оствари и директна комуникација со платформата Telegram“, но дека оттаму досега покажувале „целосна затвореност за соработка со владите на државите од која било земја“.
Првата ваква група на социјалните мрежи беше откриена пред една година, кога беа откриени околу 7.000 корисници кои си разменувале експлицитни фотографии од девојки, од кои некои и малолетни. Полицијата тогаш соопшти дека групата „Јавна соба“ по преземените мерки е згасната.
