Министерот за внатрешни работи Оливер Спасовски информираше дека Внатрешната контрола на МВР и Обвинителството работата на утврдување на начинот на кој поранешниот премиер Никола Груевски избега од Македонија во Унгарија.
Груевски на 20-ти месецов на својот Facebook профил потврди дека добил политички азил од Унгарија.
„Судот и обвинителството се претворија во инструмент за политичка уцена и пресмета со политичките неистомисленици, како и покривање на неработењето на владата. Последните одмазнички притвори на Миле Јанакиески и Кирил Божиновски, кои очигледно се притворени само за владата да ја ублажи критиката по моето заминување од земјата и барање политички азил заради политички прогон, со лажни, фабрикувани и непостоечки докази само ја потврдуваат атмосферата во која денес живее Република Македонија“, пишува Груевски во статусот на Facebook.
Министерството за правда истиот ден соопшти дека го испратило барањето за екстрадиција на Груевски до Министерството за правда на Унгарија.
Европската Комисија одби да одговори на прашања за можната екстрадиција на експремиерот.
„Одлуките за екстрадиција се надлежност на властите на земјите членки, ова значи дека кога барање за екстрадиција се испраќа до земја членка, тоа е индивидуален случај кој се третира од страна на назначената надлежна власт. Европската Комисија нема никаква надлежност да интервенира и затоа нема да ги коментира овие случаи“, изјави Кристијан Виганд, портпарол на Европската Комисија.
