Сојузот на синдикати на Македонија (ССМ) побара од градоначалничката Данела Арсовска веднаш да го разреши в. д. директорот на ЈП „Водовод и канализација“, Марјан Митовски, бидејќи ги малтретирал вработените.
Од Синдикатот на прес-конференција изјавија дека тој, освен што брка работници од работа, исто така се изживува врз нив и ги деградира.
Затоа се заканија доколку Митовски не биде сменет Скопје ќе остане без вода, како што вчера остана без јавен превоз.
„Митовски не може да се изживува врз вработените, да им дава да извршуваат плус работни задачи кои не им се во договорот. Не може хидроинженери да ги праќа да бидат чувари, на оние што не му се допаѓаат да не им дава да работат. Ова што го збориме го утврди и Државниот управен инспекторат и Трудовиот инспекторат. Затоа, ги повикуваме градоначалничката Данела Арсовска и Советот на Град Скопје да го разрешат Митовски. Немојте да дозволите да се доведете во ситуација како вчера кога немавте градски превоз да немате вода за пиење“, рече претседателот на ССМ Дарко Димовски, пишува порталот СДК.
Синдикатите најавија блокади и штрајкови ако градоначалничката Арсовска не го разреши директорот на ЈП Водовод и канализација.