Резултатите од нова германска студија покажаа дека вработени од различни делови во светот минуваат многу часови работејќи од дома и дека тоа би сакале да го прават и понатаму.
Според анкета спроведена од Германскиот институт за економски истражувања, вработените работеле од дома во просек еден и пол ден неделно. Во истражувањето биле опфатени 27 земји и работници од сите индустрии.
Во САД во просек работата од дома е 1.6 дена, во Германија 1.4, во Франција 1.3, а во Јапонија 1.1.
„Никогаш пред ниту еден настан, како пандемијата на коронавирусот, така сеопфатно не е променет животот на работниците во толку краток период“, коментира Матијас Долс, истражувач од Институтот.
Германскиот научник работел со колеги од 5 други истражувачки институции во САД, Велика Британија и Мексико, вклучително и универзитетите Стенфорд и Принстон.
Работниците повеќе сакаат да работат од дома отколку нивните шефови
Долс смета дека резултатите даваат просечна вредност и опфаќаат и некои индустрии во кои работата од дома воопшто не е можна. Истражувањето го спроведе британски Институт за истражување на пазарот. Резултатите се темелат на вкупно 36.000 анкетирани, а истражувањето е спроведено во летото, 2021 година и на почетокот на годинава.
Истражувањето покажа дека работниците повеќе сакаат да работат од дома отколку нивните шефови. Во просек во сите 27 земји 36.000 испитаници сакале да работат од дома во просек 1.7 дена во неделата.
Компаниите, пак, би сакале да ги гледаат вработените почесто во канцеларија. Во просек планираат или сакаат нивните вработени да работат од дома само 0.7 дена неделно.