Победата на Баерн над Волфсбург од 4:0 ја обележаа двајца играчи.
Томас Милер го прослави својот 400. настап во дресот на Баварците во Бундеслигата, додека Роберт Левандовски постави уште еден рекорд.
Полскиот голгетер постигна 43 првенствени гола во една календарска година, оставајќи го зад себе резултатот на легендарниот Герд Милер од 1972 година. Тогаш поранешниот голгетер на Баерн постигна 42 гола на првенствени натпревари.
Со ова, „Супер Лева“ го постигна 69-от гол во сите натпреварувања на клупско и репрезентативно ниво во 2021 година.
На тој начин го израмни резултатот на Кристијано Роналдо од 2013 година, во периодот кога Португалецот го носеше дресот на Реал.
На вечната листа пред нив двајца е само Лионел Меси со онаа нереална 2012 година во која постигна дури 91 гол.
„Многу сум горд на цела година. Мислам дека изминатите месеци играв на уште повисоко ниво. Тоа беше турбулентна година, со многу емоции“, рече Левандовски, алудирајќи на фактот дека остана без наградата Златна топка.
Левандовски изјави и дека ова е најдобриот начин Баерн да ја заокружи успешната година.
„Сега ќе можам да уживам во слободното време со пријателите и семејството. Во 2022 година можеме да влеземе во добро расположение“, заклучи напаѓачот на Баерн.