Новиот филм за агентот 007 беше премиерно прикажан во Лондон, 18 месеци по планираното поради пандемијата со коронавирусот.
Британскиот актер Даниел Крег по петти пат ја одигра улогата на Џејмс Бонд во No Time To Die и со овој филм се прости од тајниот агент. Зборувајќи во живо на црвениот килим, истакна дека оваа улога е неверојатно важна за киното и историјата.
„Не ги правиме филмовите поради нас, туку заради други. Не можам да дочекам луѓето да го гледаат филмот. Пред една година, ова ми изгледаше како сон“, изјави Крег.
На свечената премиера во Лондон најголемо внимание предизвика војвотката Кејт Мидлтон, која на премиерата пристигна со сопругот Вилијам како и во друштво на принцот Чарлс и Камила Паркер. Кралската четворка позираше пред новинарите и се поздрави со актерите.
Кејт блесна во златна тоалета на Џени Пекам, со отворено деколте и го украде вниманието на медиумите, засенувајќи ги актерите на црвениот килим.
No Time To Die е најдолг филм за Џејмс Бонд и трае два часа и 43 минути. Снимањето чинеше околу 214 милиони евра и се одржа на локации во Лондон, Италија, Јамајка и во Норвешка.