Светската здравствена организација (СЗО) ги повика сите држави внимателно да ја следат ситуацијата со избивањето на птичјиот грип и веднаш да информираат за случаи на заразени луѓе, предупредувајќи дека не смеат да се пропуштат раните сигнали.
Различните варијанти на птичјиот грип минатата година се ширеа низ Европа и Азија, доведувајќи до масовно колење на живината во некои држави, како и неколку смртни случаи кај луѓе во Кина.
„Само од ноември минатата година речиси 40 држави известија за нови случаи на многу патогениот птичји грип кај живината или кај дивите птици. Географската дистрибуција на тие случаи рапидно се шири, а бројот на генетските варијанти на вирусот што моментално циркулираат ја ставија СЗО во состојба на највисоко внимание“, рече Др. Маргарет Чен, пред извршниот комитет на оваа агенција на Обединетите нации во Женева.
Во Кина од декември е забележан „изненадувачки и значителен раст“ на бројот на луѓето заразени со вирусот H7N9, а СЗО не ја отфрла и можноста дека во Кина болеста се префрлила и од човек на човек, но засега нема информации за поголемо ширење на болеста.
„Светот е по подготвен за следната пандемија на грип, откако H1N1 се прошири низ светот во 2009 и 2010 година, но недоволно“, тврди Чен и додава дека „не смееме да дозволиме да ги пропуштиме раните сигнали“.
