Општината Аеродром и оваа година е домаќин на Меѓународниот театарски фестивал на комедијата „Гола Месечина“.
Со претставата „Страданијата на првата брачна ноќ на Миле Султан“ од Србија во среда (21.06.2023) ќе се одбележи отворањето на годинешното десетто издание на меѓународниот фестивал на комедијата „Гола месечина“, што ќе се одржи од 21 до 25 јуни на фудбалскиот стадион „АМС Реонски центар“ во населбата Реонски центар во Општина Аеродром.
Традиционалниот фестивал е во организација на Општина Аеродром и НУ Театар Комедија, а годинава акцентот на репертоарот е ставен како на врвни театарски претстави и актери од регионот, така и на стенд-ап настапите на македонски познати комичари и актери, кои последните години привлекуваат огромен интерес кај публиката.
Претставите и стенд-ап настапите ќе бидат со почеток од 21 часот. Влезот е слободен и е дозволен само за лица над 16 години.
„Ве повикуваме на уште едно театарско дружење на една од петте вечери, со кое низ смеа, забава и квалитетна програма, ќе го одбележиме доаѓањето на летото во Општина Аеродром“, објави Општината.