На Алекс Џонс, теоретичар на заговор кој лажно тврдел дека пукањето во училиштето Сенди Хук во 2012 година е измама, му е наредено да плати 965 милиони долари отштета на семејствата на жртвите во тој масакр.
Семејствата на 8 жртви и агент на ФБИ, кој реагирал на нападот, бараа најмалку 550 милиони долари на судењето за клевета во Конектикат. Тврдат дека дезинформациите на десничарскиот радиоводител довеле до децениско вознемирување и закани со смрт.
Во основното училиште Сенди Хук беа убиени 12 деца и 6 возрасни лица. Џонс со години тврдеше дека масакрот е лажен, владина завера за да се одземе оружјето од Американците. Тврдеше дека „никој не умрел“.
Родителите на жртвите ги нарече „кризни актери“ и тврдеше дека некои од нив не ни постојат.
Денес, Џонс признава дека нападот бил „100% вистински“, а тоа го призна во август на одвоено судење за клевета во Тексас.
Додека беше читана пресудата, членови од семејствата на жртвите беа видно емотивни, а некои и се расплакаа. Судењето беше одбележано од емотивното сведочење на родителите кои останаа без деца. Некои опишаа дека биле изложени на интернет омраза, а други дека морале постојано да се преселуваат поради безбедносни причини. Еден од родителите, Марк Барден, раскажа како слушнал дека луѓе го сквернават гробот на неговиот син Даниел, „мокрејќи по него и заканувајќи се дека ќе го ископаат“.
Поротниците исто така слушнаа и докази дека Џонс и неговата компанија заработиле милиони долари од продажба на додатоци за исхрана, опрема за преживување и други производи. Тој апелираше до неговите обожаватели да дадат итни донации и вети дека средствата нема да одат за неговите правни трошоци, туку за „стабилизација на компанијата и борбата против оваа измама“.