Двајца од четворицата терористи од Таџикистан, кои во петокот го извршија нападот во „Crocus City Hall“ во Москва, неодамна отишле во Турција за да ги обноват своите руски дозволи за престој, потврди денеска за Reuters неименуван турски безбедносен претставник.
„Тие веројатно добиле инструкции за вооружен напад кога патувале за Турција“, објави синоќа рускиот весник Известия, цитирајќи неименуван извор.
Останатите двајца осомничени за учество во терористичкиот злочин, кој ги однесе животите на најмалку 139 лица, биле регрутирани на територијата на Русија, изјави изворот.
Подоцна на 25 март, турски безбедносен функционер изјави за Reuters дека двајцата обвинети вооружени напаѓачи накратко влегле во Турција за да ги обноват нивните руски дозволи за престој, но не биле радикализирани во Турција. Тие не биле предмет на никаков налог за апсење и на тој начин можеле слободно да патуваат меѓу Русија и Турција, додаде официјалниот претставник.
Двајцата терористи на 2 март годинава со истиот лет отпатувале од Турција за Москва, изјави изворот.
Руските власти ги идентификуваа четворицата осомничени како Далерџон Мирзојев, Саидакрами Рачабализода, Шамсидин Фаридуни и Мухамадсобир Фајзов. Сите се државјани на Таџикистан, кои работеле во Русија.
„Не би било коректно да се опише групата осомничени како организирана заспана терористичка ќелија во класична смисла“, според друг неименуван извор, цитиран од Известия. Групата не била формирана како ќелија во ниту една структура, туку била составена буквално неколку недели пред нападот со парични исплати на сторителите, наведува изворот.
Фаридуни за време на сослушувањето признал дека пристигнал во Русија од Турција на 4 март, пишува Известия.
„Ислушнав лекција на Telegram, еден проповедник. Тогаш помошникот на проповедникот понуди пари. Петстотини илјади руски рубли, што е околу 5.500 долари. Убивај, без разлика кој“, рекол Фаридуни на распитот.
Најмалку 139 лица загинаа, а 182 се повредени во нападот на „Crocus City Hall“, за кој одговорноста наводно ја презеде ИСИС.
Фаридуни на 23 февруари објавил фотографии на социјалните мрежи од Истанбул, објави и Известия.
„Вахабистичките проповедници беа во отсуство ставгени на потерница од страна на Русија - на пример, Абдулах Костекскиј и Абу Умар Саситлинскиј. И двајцата во моментов живеат во Турција, според еден од изворите на весникот.
Путин изјави дека терористичкиот напад на концертната сала „Crocus“ во Москва го извршиле радикални исламисти.
„Знаеме дека злосторството е извршено од раце на радикални исламисти. Самиот исламски свет со векови се бореше против таа идеологија. Оние што го планираа терористичкиот напад се надеваа дека ќе посеат паника и раздор во нашето општество, но наидоа на единство и решителност да се спротивставиме на ова зло“, рече претседателот.
Путин рече и дека „важно е да се добие одговор зошто терористите се обиделе да пребегаат во Украина по нападот во 'Crocus' и кој ги чекал таму“.
