Неодамна отпуштен работник тврди дека компанијата „Tesla“ го прекршила законот на Калифорнија кога отпуштила стотина вработени без претходно да ги извести.
Во тужбата која ја поднесе во вторникот, Ендру Дуарте тврди дека „Tesla“ ги отпуштила него и уште стотина работници без да ги предупреди, што е спротивно на законот, кој вели дека било која компанија мора да даде известување 60 дена претходно доколку отпушта повеќе од 50 работници.
Од компанијата пак, тврдат дека работниците биле отпуштени поради слабиот перформанс на работното место, што значи дека немале никаква обврска да ги предупредат, па така нивното отпуштање е легално.
„Како и секоја друга компанија, ‘Тесла’ спроведува годишна проценка на вработените и нивниот работен учинок, за да се одржи квалитетот на компанијата“, рече во врска со случајот еден од претставниците на „Tesla“.
Компанијата го имаше истото објаснување оваа недела, кога отпушти повеќе од сто работници од „Solar City“. Но, шест работници веќе излегоа во јавност и кажаа дека откако „Tesla“ ја купила нивната компанија, не биле спроведени проценки на вработените.
Адвокатот на Дуарте бара од компанијата на секој отпуштен работник да му биде исплатена сума во висина од две плати.