Илон Маск, најбогатиот човек во светот, е личноста на 2021 година според американскиот магазин Time.
„Илон Маск цел живот им пркоси на хејтерите, а сега изгледа конечно е во позиција да ги стави таму каде што им е местото бидејќи 2021 беше годината на Маск. Во април SpaceX постигна договор со НАСА за превоз на американските научници на Месечината, првпат од 1972 година. Во октомври доби потврда од Hertz дека 100.000 модели на Tesla ќе бидат додадени во компанијата за превоз“, пишува Time.
Маск тежи 250 милијарди долари и на хартија е најбогатиот човек во историјата. Сопственик е на Tesla и на SpaceX. Се занимава со криптовалути, соларна енергија, сака да го насели Марс со луѓе. со неговите објави на Twitter секојдневно ја шокира јавноста и влијае на пазарот со криптовалути.
Често има зборувано за тешките почетоци во кариерата, дека не можел да си дозволи да живее под кирија па спиел во канцеларијата во која работел. Не ги криеше ни емоциите кога во една прилика се присети на големата криза во 2008 година кога Tesla беше на работ на банкрот.
Маск е татко на шест сина, а според последните информации, тој и сега не поседува сопствен дом бидејќи неодамна ги продаде недвижностите кои ги поседуваше.