Иако му го позајми гласот на каубојот Вуди од анимираниот серијал „Toy Story“, актерот Том Хенкс никогаш не играл во вестерн филм, сè до новиот филм на Пол Гринграс, „News of the World“.
Бројни генерации пораснаа со овој жанр, а трендовите во американската кинематографија најчесто ги заобиколуваат вестерн филмовите. Но, одвреме-навреме може да видиме добри вестерн филмови од режисери како Квентин Тарантино и Алехандро Гонзалес. Всушност, Тарантино е режисер кој е познат по тоа дека упорно истакнува како вестерн филмовите се негов омилен жанр.
Најновиот филмски проект на режисерот Пол Гринграс е во вестерн атмосфера, дејството се одвива во 1870 година во Тексас. Главниот лик е конфедерацискиот капетан Џеферсон Кајл Кидо (Том Хенкс) кој по Граѓанската војна останал без сопругата, па трауматизиран патува низ Југот, каде заработува за живот така што им чита вести на неписмените луѓе.
Напуштајќи едно од гратчињата, ќе наиде на нападната кочија и линчуван црн маж, кој по налог на војската превезувал девојче (Хелена Зенгел). Девојчето неколку години претходно било киднапирано од Индијанци. Кид ќе има отежната комуникација со детето, кое не знае да зборува на својот мајчин јазик и не се сеќава на сопственото семејство.
Од документацијата ќе дознае дека девојчето е ќерка на германски доселеници кои биле убиени од Индијанците. Убиениот писмоносец требало да го однесе девојчето кај роднини во германска заедница во Тексас. Кид одлучува да ја исполни таа мисија.
Филмот премиерно беше прикажан на 9 февруари на Netflix, а во последните денови критичарите најмногу зборуваат за него. Филмот е снимен во пустина, во друштво на змии отровници и непријателско опкружување, но носи моќна порака и навистина вреди да го изгледате.