Американскиот претседател, Доналд Трамп, изјави дека се надева на состанок со лидерот на Северна Кореја Ким Џонг Ун, како и тоа дека за местото на кое треба да се одржи средбата се разгледуваат пет локации.
Меѓутоа, тој не ја отфрли можноста и состанокот воопшто да не биде одржан.
Трамп рече и дека Јужна Кореја има негов благослов да се обиде да ја заврши војната со Пјонгјанг.
„Луѓето не сфаќаат дека Корејската војна не е готова. Токму сега се одвива. И тие разговараат за крај на таа војна. Го имаат мојот благослов да разговараат за крај на војната“, изјави Трамп.
Тој кажа дека САД почнале директни разговори со Северна Кореја на „екстремно високо ниво“, за да се обидат да го договорат неговиот состанок со Ким.
„И навистина верувам дека добрата волја ни овозможува да се случуваат добри работи. Ќе видиме што ќе се случи, бидејќи на крајот се смета резултатот, а не фактот дека размислуваме за состанок“, изјави Трамп.
Тој спомена и дека е возможно дипломатските напори за организација на тој состанок да пропаднат.
Американскиот претседател го прими јапонскиот премиер Шинзо Абе во Флорида, со кој освен за Северна Кореја разговараше и за трговски, воени и безбедносни прашања.
Јапонскиот премиер истакна дека му се восхитува на Трамп поради „храброста“ да се сретне со севернокорејскиот лидер.