Летото е веќе при крај, па почнуваат подготовките за ставање на првата зимница. Иако повеќето домаќинки ова го прават по веќе добро позната рецептура, често се случува зимницата да се расипе пред зимата.
Ова се најчестите грешки поради кои се случува тоа:
1. Неправилно стерилизирани тегли
Ако теглите се лошо или недоволно стерилизирани, во нив може да останат бактерии и разни штетни микроорганизми, а тоа може да доведе до ферментација на овошјето и зеленчукот. За да го избегнете ризикот од оваа појава, важно е да се изведе стерилизацијата на правилен начин.
Добро измиените тегли и капаци наредете ги во рерна загреана на 180 степени, 15 до 20 минути. Внимавајте зимницата добро да ја затворите, капачињата да бидат добро зацврстени за да не влезе воздух во нив.
2. Употреба на презрело овошје и зеленчук
Презреано овошје и зеленчук побрзо може да се расипе и распадне, дури и кога користите конзерванси. Иако повеќето мислат дека поради позрелите плодови зимницата ќе биде послатка, тоа е голема грешка.
Бирајте цврсти плодови кои не се оштетени ниту имаат точки кои укажуваат на оштетување или презреаност.
3. Лошо место за чување
За да трае зимницата подолго, мора да се чува на место каде нема провев, влага, топлина и не е директно изложена на сончева светлина.
Сите тие фактори кои влијаат на забрзана ферментација на овошјето и зеленчукот во тегла водат кон нивно побрзо расипување.
