Фудбалерите на Милан и Монца на 8 август ќе одиграат ревијален натпревар наречен Трофеј Силвио Берлускони, посветен на починатиот претседател на овие два клуба.
Поранешниот премиер на Италија беше голем фан на Милан и негов сопственик во периодот од 1986 до 2017 година, под чие водство клубот од „Џузепе Меаца“ ги постигна најголемите успеси.
„Росонерите“ под водство на Берлукони освоија неверојатни 28 трофеи, меѓу кои и 5 титули шампион на Европа.
По заминувањето од Милан, Берлускони ја купи Монца во 2018 година и успеа тогашниот третолигаш да го донесе во Серија А за прв пат во историјата, а имаше и план овој клуб да го претвори во европски гигант.
Инаку, натпреварот под името Трофеј Силвио Берлускони ќе го замени традиционалниот натпревар Трофеј Луиџи Берлускони кој Силвио го започна во 1991 година во спомен на својот татко Луиџи. Овој натпревар се играше до 2021 година.
Натпреварот ќе се игра на „Ју-Пауер“ стадионот во Монца.