Министерството за внатрешни работи извести дека тројца од напаѓачите кои вчеравечер извршија терористички напад во Виена, освен австриско имаат и македонско државјанство.
Преку Европол, австриската полиција до МВР доставила барање за соработка и информации околу терористичкиот напад кој се случи синоќа.
„Денеска (03.11.2020) од австриската полиција, преку Европол, до Министерството за внатрешни работи беше доставено барање за соработка и информации околу терористичкиот напад кој се случи синоќа во Виена. Од списокот на австриската полиција, кој е доставен до повеќе полиции, меѓу кои и нашата, утврдено е дека три лица покрај австриското имаат и државјанство на Република Северна Македонија, и тоа К.Ф. (роден во Модлинг, Австрија), А.Г. (роден во Сент Полтен, Австрија) и У.А. (роден во Виена, Австрија). Секторот за меѓународна полициска соработка при МВР веднаш се стави на располагање на колегите од Австрија и интензивно соработуваме на сите елементи поврзани со овој случај“, стои во соопштението на МВР.
Според последните информации, бројот на починати по вчерашниот напад во Виена порасна на петмина починати, што значи дека настрадаа четири минувачи и еден напаѓач. Уште седум други луѓе се борат за живот, пренесува АPA. Во повеќе болници во градот има 17 луѓе кои се тешко повредени, а 10 луѓе се во шок.
Заев и Курц изразија подготвеност да ја продолжат комуникацијата и соработката во врска со теорористичкиот напад
Премиерот Зоран Заев денеска оствари комуникација со неговиот австриски колега Себастијан Курц во врска со терористичкиот напад.
Од Владата за МИА информираа дека Курц изразил благодарност до Заев поради искажаната солидарност и поддршка.
„Премиерите изразија подготвеност да ја продолжат комуникацијата и соработката во врска со теорористичкиот напад доколку австриските служби утврдат таква потреба“, велат од Владата.