Свет

Турција стави под карантин авион од Иран со 132 патници и членови на екипажот

25. февруари 2020 - 15:14 | МИА

Турските власти денеска во карантин ставија 132 патника и членови на екипажот на авионот на Turkish Airlines од Иран заради сомнение дека некој од нив е можно да е носител на новиот корона вирус.

Турското Министерство за здравство соопшти дека на сите лица од авионот им е одреден карантин од 14 дена во болница во Анкара специјално подготвена за тоа.

Агенцијата Анадолија наведува дека за 17 патници од летот има сомненија за присуство на корона вирус Covid-19, пред сѐ бидејќи имале покачена температура. Авионот слетал во Анкара на пладне, а првите примероци за тестирање на патниците им биле земени уште во авионот.

Турција во неделата го најави првото привремено затворање на својата копнена граница кон Иран, каде во последните денови постојано расте бројот на заболени од Covid-19.

Денешниот лет од Техеран бил наменет за враќање на Турците од Иран, наведе Министерството за здравство.

Од почетокот на епидемијата на коронавирусот турските власти презедоа драконски мерки во обид да се избегне заразата, од откажување летови до поставување термовизиски камери во Истанбул.

Министерството за здравство денеска нагласи дека досега во земјата не е потврден ниту еден случај на заразен со корона вирусот.

Коментирај