„Еден од клучните команданти на џихадистичката организација Исламска држава е убиен во воена операција во покраината Нангахар“, соопштија авганистанските безбедносни сили, наведувајќи дека станува збор за Саад Емарати.
Саад Емарати бил еден од основачите на авганистанско-пакистанскиот огранок на Исламска држава, кој предводел неколку големи напади врз владини објекти.
Според изјава на неименуван авганистански функционер за BBC, Емарати е еден од 120-те џихадисти убиени во воената операција во округот Кот. Оваа операција беше покрената неколку дена по бомбашкиот напад на Исламска држава во Кабул врз припадниците на шиитската заедница Хазара, во кој загинаа најмалку 80 луѓе.
Емарати е поранешен командант на талибаните кои се поврзани со Ал Каеда. Тој ја променил страната и ѝ се приклучил на Исламска држава по смртта на основачот на талибанското движење Мула Омар. Аналитичарите сметаат дека тој е еден од најважните водачи на Исламската држава во регионот и оти, доколку биде потврдена неговата смрт, тоа ќе биде сериозен удар за џихадистите во источен Авганистан.
