Денес, украинскиот парламент на социјалните мрежи објави дека белоруската војска влегла на територијата на Украина, откако претседателот Александар Лукашенко тврдеше дека тоа нема да се случи.
„Белоруски трупи влегоа во регионот Чернихив. Информациите ги потврди портпаролот Виталиј Кирилов од воените сили Север. Следуваат повеќе детали“, стои во објавата.
Претседателот на Белорусија, Александар Лукашенко, претходно изјави дека земјата не планира да се придружи на руската инвазија на Украина, негирајќи ги наводите на Киев дека руските трупи ја напаѓаат Украина од белоруска територија.
Според неговите зборови, војската на Белорусија не учествувала и нема да учествува во конфликтот и тврди дека тоа може на сите да им го докаже.
„Руското раководство никогаш не го покрена ова прашања за нас со наше учество. И понатаму немаме намера да учествуваме во оваа специјална операција во Украина. Нема таква потреба. Државната граница ја покриваме со сопствени сили“, заклучи Лукашенко.
Тој истакна дека во Белорусија сите борбени системи се доведени на борбена готовност.
И покрај тврдењата на Лукашенко, постојат бројни извештаи за учество на Белорусија во руската агресија на Украина.
Пред два дена, советникот на украинскиот министер за внатрешни работи Антон Гарашенко соопшти дека ракетите Искандер се лансирани од Белорусија во Украина.
