Уште во 2019 година, Bugatti објави нов уникатен хиперавтомобил наречен La Voiture Noire вреден 18 милиони евра, а сега тој е конечно готов.
Уште оттогаш, La Voiture Noire е фасцинантна тема на разговор за љубителите на автомобили. Bugatti го покажа за Божиќ минатата година и објави тизер минатиот месец, а неговиот купец може да се радува затоа што автомобилот е конечно готов.
Претседателот на Bugatti, Стефан Винкелман е многу горд на новата креација.
„Со завршувањето на работата на моделот La Voiture Noire, уште еднаш покажавме дека сакаме да ги развиваме најсофистицираните хиперспортски автомобили во светот“, рече Винкелман.
Каросеријата е изработена од јаглеродни влакна, а автомобилот го доби името според моделот Type 57 SC Atlantic познат уште како La Voiture Noire, кој му припаѓаше на Жан Бугати, синот на Еторе Бугати, а кој исчезна по Втората светска војна.
Браниците се интегрирани во каросеријата, а шофершајбната личи на визир на кацига, што дава впечаток дека автомобилот е направен од еден дел.
Предните светла се состојат од 25 поединечни елементи, а предната решетка е направена со употреба на 3D печатач.
На задната страна има шест индивидуални издувни цевки, додека внатрешноста е тапацирана со Хавен кафеава кожа.
Режимите на возење се менуваат со притискање на копче направено од ружино дрво.
Засега нема детали за перформансите, а познато е дека автомобилот чини 18 милиони долари.
